باركولي قررت أفتح مشروعي المنتظر" محل الإئتلاف للإستيراد والتصدير " .

كل شاب فينا بيكون عندوا حلم إما وظيفه حكوميه مرموقه مشهوره في الدوله أو في قطاع خاص يتقدم ليه نفس الحقوق في القطاع العام من تأمين وميزات خاصه تانيه أفضل أو أنه يسافر للخارج دوله عربيه أو أجنبيه وفي النهايه لو كل ده ما حصلش بيبدأ بقه يسلم للواقع ومش يحبط ويفتح مشروع علي قده كده صغيره وربنا بيكرمه بعد كده بقه بزباين تكبره ليه ويكبر المشروع وبقه ومين عارف بيقولوا بتاع شركه toshiba كان بيبيع إمشاط علي الكبري وشوفوا بقه عامل إزاي دلوقت ...

المهم أخدكم معايه بقه في مشروعي المنتظر من زمان بقه ومستني الفرصه اللي تخليني أقدر أفتحه وأضمن له مكسب مضمون يعني أشوف كده السوق أيه نظامه شبعان من الطلب ولا عايز كمان فيه فجوه تسويقيه الحاجات دي يا عم أمال فكركم ايه انا مدقق وفاهم في كل حاجه ومتربص للفرصه دي من زمان.

بعد الصلاه علي النبي كده جت الفرصه العظيمه دي وفيه طلب والناس عطشانه قوي للإئتلاف قولت بس هو ده بقه مشروع حياتي فقررت إفتح المحل بقه وأتشهر وأطلع في كل حته كده ويطلعلي إعلانات وصورتي بقه في كل الجرايد والمواقع وأعيش بقه ...........

وتوكلت علي الله فتحت المشورع أعوذ بالله إزاي أذكر إسم ربنا في النصب ده قصدي في المشروع ده يعني وأكل عيش وأأكل الصبيه اللي معايه في المشروع أمال فكركم أيه يعني هو المشروع ده هيفتح بيتي انا بس بالعكس هيفتح بيوت كتير يا جدعان.

المهم بقه بعد ما الموضوع سخن والمشروع كبر وبقه فيه زباين كتير وشغيله بقه قررت أفتح له مقرات في كل محافظه زي كتنانكي ده ولا اسمه ايه اللي بياكلوا منه العيال بتوع ميدان التحرير وفتحت في كل محافظات مصر ومراكزها كمان والعمليه زي القشطه والمكاسب نازله تلف بقه تبرعات و تطوعات وشغل عال العال بقه وتكيفيات ومكاتب وإشي مقابلات في التلفزيونات و الجرايد

وسي الأستاذ صاحب محلات الإئتلاف راح وسي الإستاذ صاحب محل الإئتلاف جه وإشي بيانات بخصوص الإطعمه الفاسده الملفقه لينا و تجاهل الزبون اللي عملت علشانه محلات الإئتلاف في كل مكان ومحافظه وقال أيه بيقولك الزباين اللي في المحاظات أياها اللي كانت إتسممت قبل كده من محلات البعده ما عملناش ليهم معاملات خاصه في الأسعار وقال أيه بيقولك ليهم مطالب ومش بنسأل فيهم ......

والله أنا بتكلم مع مسؤلي المحلات في المحافظات أيه الحكايه قالولي  الرد اللي في الفيديوا ده

خلاص بصراحه ما ليش كلمه بقه أصل الغنائم بتاع محلات الإئتلاف كتيره قوي وبصراحه انا هكبر مخي انا كمان والعمليه بقت لوز كده و أخذنا مقر في الوزاره علشان نتابع الزباين اللي عايزه حاجه وبكده نبقي ضربنا عصفورين بحجر الظاهر قدام الناس إننا بنساعد الزباين بتوعنا في المحلات في كل محافظه والحاجه التانيه هو فيه حد هيجيلنا برده مقر رئاسه الوزاره ويسيبوه برده يا راجل كبر مخك......

وأتمني في النهايه تكون سلسله محلات الإئتلاف للإستيراد والتصدير عجباكم وإنتظروا فروعنا في القري قريبا

في الحقيقه دي كانت رساله مني انا مش من صاحب الإئتلاف دي رساله مني أنا زبون من الزباين للمحل وأعتقد صوتي ورسالتي مفهومه واللبيب بالإشاره يفهم .


محمود السيد 

مصاب من مصابي ثوره 25 يناير المشردين