الشعب يريد إقــاله منصور العيســـوي

يوم الجمعه 4 مارس من الشهر السابق جائتني مكالمه تلفونيه من مدينه إسنا قالي مبروك علينا وزير الداخليه الجديد ...
الغريب مش المكالمه الغريبه أن المكالمه من شخص ينتمي للجماعه السلفيه ممن ذاقوا الأمرين علي أيدي أمن الدوله يتصل  يباركلي علي وزير داخليه ؟؟؟؟؟؟؟ معقول الثوره هبلت الناس
علي العموم قولته الله يبارك فيك هو مين بقه وزير الداخليه ده قالي اللواء منصور العيسوي محافظ قنا وشخص كويس جدا وعارف ربنا وإستبشر فيه خير ..
بصراحه بيني وبينكم أنا ما كنتش عارفه قوي ولكن ما دام شخص سلفي قال كده يبقي الوزير فعلا كويس لأنهم من أكتر الناس اللي عارفين الظباط كويس وعارفين فيهم الكويس ومين فيهم اللي لا دين له ....

وبالمناسبه الشخص ده قبل ما يكون في مدينه تابعه للمحافظ السابق منصور العيسوي كمان بلدياته من إسنا اللي تربي فيها اللواء منصور العيسوي و أخد الإبتدائيه فيها قبل ما تفصل إسنا وتاخد قرار بضمها للأقصر من شهور ..

خلصت معاه في المكالمه وإسبشرت خير بصراحه وقولت شكل الثوره هتحقق مكاسب عظيمه وهيكون أول مقتطافتها مصالحه مع الأمن ونبقي أيد واحده فعلا ولكن يظهر طعم الكرسي بيغير ويجلب مرض التراخي للمسؤل ....

بعدها بدأت أقرأ في حوارت و تصريحات اللواء العيسوي وأشوف كده وكمان نشوف المطالب المعروضه من الثوار بخصوص الأمن و حل أمن الدوله ومحاكمه الفاسدين ولكن كان في كل حوار أقرأه للوزير أري سقطتات له تثير من غضبي ولكن أقول معلشي كان الله في العون ...

يعني مثلا كده علي سبيل المثال الحوار اللي كان مع سياده الوزير علي المصري اليوم سأله المحاور عن المقدم محمد عبد الرحمن وأكيد كلنا طبعا فاكرين من هو المقدم ده أفكركم بيه ...
ده المقدم اللي عمل إضراب أمام مبني المحافظه في المنصوره بسبب تهديد بقايا المفسدين في جهاز الأمن له بالقتل إذا لم يسلم لهم أوراق اللتي تدينهم وبغض النظر عن صدقه أو كذبه

فكان رد اللواء كالتالي : أنه مريض نفسي وتم محاكمته ثلاث مرات من قبل ولم يفهم لماذا يقوم بهذه التصرفات وإعلانه أكثر من مره بإنه تعرض للقتل إثناء خروجه من إستديوا قناه الجزيره ...

وكنا وقتها فعلا مش نحب نسمع أي كلمه متعلقه بالنظام القديم ولو كانت صحيحه فلما قال كده مع المحاور بصراحه تم إثاره أشخاص كثير التعبير ده .......

ولما سؤل في نفس الجريده في بقيه للحوار عن علاقه العادلي بإخراج السجون في طره أو المساجين عموما قال الكلام ده كذب والمساجين خرجوا وهربوا بطريقه منظمه :::

طيب أسمعوا مني التعليقين دول من مسجون وظابط شرطه :

• ظابط برتبه ملازم اللي هي بنجمتين : يوم الإنفلات الأمني كنا واقفين بالليل في الشارع بنقول هنأمن الشارع إزاي لقيت إحدي الأصدقاء الظباط في المنطقه جي يتكلم معانا وبنسأله في ايه بالمناسبه هو ظابط في مباحث كفر الشيخ قال إن جاتلهم أوامر بترك الأماكن والخروج من المركز وترك الأسلحه علشان في ناس هتدخل تاخدها وقال اللي بيحصل ده مخطط من قبل وزاره الداخليه ومن قبل العادلي عايزين يشيعوا الفوضي في البلاد والناس تقول إحنا أسفين علي الثوره الكلام ده كنا لسه في بدايه الثوره .....

• مسجون هارب من سجن أبو زعبل : نفس اليوم وإحنا بقه واقفين نحرص الشارع زي ما كل شباب مصر بيعملوا كده الساعه 2.3 الفجر قولت أروح علشان كنت تعبت شويه لقيت واحد في الشارع جار من زمان مش شوفته سلمت عليه وهو كان في السجن اللي تم الهجوم عليه فسألته ايه اللي حصل ؟ معاكم 

قالي أنه فجأه وهو كان في السجن هو وزمايله بيعملوا أكل وهو بيتفرج علي التلفزيون لقي أن في النشره بيقولوا أن فيه هجوم علي السجن بتاعهم فبيقول لصاحبه إلحق يا عم بيقولك فيه هجوم علينا قالوا يا عم ده التلفزيون المصري فكك منه ......
فجأه شموا ريحه غريبه وبتحرق العين وسمعوا صوت رصاص حي وفجأه لقوا واحد داخل عليهم يفتح الزنازين دي وقالي أنه مسجون زيهم وقالي كمان أن السجن ده قوضه داخل قوضه وبصراحه مش فهمت منوا قوي لأن الموضوع ده كنت واخده منه علي سبيل الفشر وقالي كمان أن اللواء بطران اللي قتلوا العادلي وانا ما صدقتوش برده لعند ما أخت اللواء أعلنت الموضوع صراحه وعملت محضر عن النائب العام بكده .........

وقالي كمان أن الناس اللي كانت بتضرب عليهم نار دول أمن شرطه مش عرب لأنه عارف لهجه العرب كويس جدا جدا وقالي دول أمن لابسين زي العرب من قوات العادلي الخاصه لأنه بعد ما هرب من السجن بسبب القتل اللي كان بيحصل والضرب الألي راح علي ناس عرب صحابه أكلوه ولبسوه وأدوله فلوس علشان يروح كلهم نفوا صلتهم بالموضوع ده ............

وسؤل اللواء منصور عن القناصه اللي كلنا شوفناهم في الفيديوهات وهما بيقنصوا المتظاهرين قااال الداخليه ما فيش فيها قناصين وقال الكلام ده في حوار مع عمرو أديب علي القاهره اليوم من يومين تقريبا واللي نفته النهارده لجنه تقصي الحقائق أن اللي قتل المتظاهرين هما قناصه من الداخليه من مكافحه الإرهاب التابع لأمن الدوله ....

وبالنسبه لعوده الأمن أيه النظام يعني حالات البلطجه دي أيه نظامها ولا حقيقي كلام مقدم شرطه من يومين علي الوفد أنهم مش هينزلوا غير أما الشعب يبوس أيدهم ..................

وشوفوا الصوره دي في مركز أجا كان بلطجي أعتدي علي أحد سكان المركز بالضرب وربطه في شجره وضربه بالمطوه والسيف وسكينه والفيديوا موجود ولكن مش عايز أرفعه ليكم علشان فيه كلام خارج وكمان مش أحب أنشر روح الإحباط فيكم وأخوفكم
وكان تصرف الأمن أما جه بالسلامه بعد ما واحد محترم راح جابهم ضرب اللي معتدي عليه ومربوط في الشجره وسايح في دمه وحطه في البوكس وساب البلجيه بعد كده لما أهل البلد كلهم تظاهروا وأحاطوا بيت البلطجي زي ما هتشوفوا الصوره دي
وكانوا هيقتلوه هو و أولاده تدخل كبار البلد والشيخ الفاضل مصطفي العدوي لتسليهم للشرطه في المركز يا حلاوه بجد

وقولنا الشعب هيساعد الشرطه في كده ولكن أنزلوا وكمان أمين شرطه تم الإعتداء عليه من يومين في القاهره أثناء تأديه عمله وتعدي عليه أحد المواطين البلطجيه الشعب والشباب ساعدوه في القبض علي البلطجي ده .....

الأمن منسحب تماما لو العيال الظباط اللي داخلين الكليه دول كانوا ولاد رقصات ودخلوا بالكوسه وخايفين ينزلوا الشارع يواجهوا البلطجه أو ما كنش ينفخوا الشعب مش نازلين نحب نقولهم اللي هيتكلم بأسلوب وحش مش تصرف أيد أو سلاح أو غيره هيكون مصيره السجن إحنا مش غابه ونقولكم الشعب هيعلكم والكلام ده هنسيب القانون يحاسبكم ........

وياريت اللواء منصور العيسوي يسمع لإقتراحات الناس اللي كل يوم بتنادي وتقول ضم أي دفعه من دفعات الحقوق وعينهم ظباط أو قول مطلوب خريجي جامعات رجاله لأكاديمه شرطه وشوف الرجاله اللي بحق وحقيقي......

يا جماعه شركات الحراسه قالت من يومين في الصحف أن الطلب عليهم بقا فوق الوصف راتب ظباط الأمن دلوقتي وصل 1500 مستريح في المدن أيه النظام في الأمن.................

وفي النهايه أحب أقول للواء منصور العيسوي الشعب كله وراك وكلنا نريد منصور العيسوي دائما وللأمام  وكلنا وقفنا معاك يوم ما حصل عليك هجوم من قبل بقايا العادلي و حرق مبني الوزاره من قبل بعض المندسين من الداخليه وقولنا كلنا بنفس واااااحد
الشعب يريــد العيسوي الوزير .....

ياريت تحقق لينا الأمن والإستقرار وباقي المطالب وتحاكم الكلاب الموجودين في الداخليه وتسمع شكاوي إئتلاف ضباط الشرطه للي بينادوا بالفساد للي معشش في أماكن لسه والوسطه والمحسوبيه اللي واخدها ضباط علي حساب ضباط أخرين

تفسيري الوحيد لتصرفات سيادتكم إثنين لا ثالث لهما  :

• التضليل من قبل المقربين إليك .
• وقيعه و فخ ينصب لك من قبل بقايا العادلي المجهولين في الداخليه .

والسببين مصيبه في حد ذاتهم وهنرجع لنغس النظام السابق كده

 وأخشي أن أري في يوم قريب يافتا يحملها أحد الثوار مخزاها 


الشعب يريـــــــــــــــــــد إقاله منصور العيسوي