لماذا تخـاف يا سياده المشيــر !!

في مثل هذا اليوم من العام الماضي من شهر فبراير لعام 2010 سألت نفسي سؤال وشاركت فيه بعض أصدقائي علي مدونتي وجروب معا ضد السلبيه أن ذاك اللي كان متنفس لكثير من أصدقائي علي الفيس بوك حول حال مصر والسلبيه المنتشره وقتها لماذا تخاف يا سياده الرئيس !!


ووجهت كلام إلي المخلوع مبارك وقتها وسألته ليه كل الإحتياطات دي ... حاطط نفسك رئيس لكل حاجه القائد الأعلي للشرطه والداخليه والشعب وكل حاجه وكان وقتها لا قانون بيهم ولا قضاء يلم يعني ممكن تاخد أحكام قضائيه زي ما أنت عايز وفي النهايه المجلس سيد قراره !!
وكان عامل الداخليه الجيش الخاص بيه ... علشان مش اطول عليكم واقلب عليكم العادلي وأيامه وكل واحد يفتكر الإقلام اللي أخدها سواء في أمن الدوله ولا في الشارع ولا رخصه اتسحبت منك عنوه من أمين مالوش لازمه وأجج مشاعرك وتكسر الشاشه !!

لأ وفرها لأخر المقال وإكسرها مره واحده أو إخبط في اللي جنبك مراتك عيالك صاحبك اي حد او حتي اللي علي الجهاز اللي جنبك في السايبر هيحصل ايه يعني ... علقه تفوت ولا حد يموت.


بسأل النهارده في مثل هذا اليوم اللي سألت فيه مبارك ليه بتخاف وبعدها بكام شهر إتسجن يمكن الدايره تلف علي صاحبنا :) ,, اللهم أحفظنا .


طل علينا معالي نائب رئيس الوزراء السلمي بيه من أبناء الوفد بوثيقه دستوريه الصلاه علي النبي كده الراجل ده بيقولنا الشعب ده فوضني عنه بالكلام اللذيذ ده .؟


ونشوف البند ده يقول ايه ؟

الدولة وحدها هى التى تنشئ القوات المسلحة، وهى ملك للشعب، مهمتها حماية البلاد وسلامة أراضيها وأمنها والحفاظ على وحدتها وحماية الشرعية الدستورية ولا يجوز لأية هيئة أو جماعة أو حزب إنشاء تشكيلات عسكرية أو شبه عسكرية.

يعني بالعربي كده يا فكيك لو نويتم علي ثوره ثانيه ولا ثالثه هتلاقي في إستقبالكم مش الشرطه بقه المره دي لألألألألألألألألألألألأ هنلاقي الجيش لأنه هو المنوط بحمايه الشرعيه الدستوريه للحاكم بأمره الأن وهو سياده اللواء المشير طنطاوي :)


ولو فكرت تعمل تجمعات او معسكرات هينفخوك بحجه تشكيلات عسكريه ويجيبوك واقف في مكان فاضي بتفكر او بتفضض للبحر يقولك اللواء الرويني ملك الإشاعات وإبنه زوبايدر شايفينه يا شعب مصر والله ما حدش فاهم حاجه :)) دلوقتي هيأمر البحر ويطلع منه الإسلحه بتاعته :))


البند الثاني في المقال :


ويختص المجلس الأعلى للقوات المسلحة دون غيره بالنظر فى كل ما يتعلق بالشئون الخاصة بالقوات المسلحة ومناقشة بنود ميزانيتها على أن يتم إدراجها رقماً واحداً فى موازنة الدولة، كما يختص دون غيره بالموافقة على أى تشريع يتعلق بالقوات المسلحة قبل إصداره.

كلام سليم ما هو برده ما فيش معارض او شاب هيطلع يعتصم علشان يقولك هو الجيش بيعمل ايه هنا في المكان ده وبيدرب ليه !!! 
وبرده بالنسبه لميزانيه الجيش دي يعني ممكن اختلف واتفق ؟

أنا بصراحه مش عارفه هي هضر فيه ايه لو إتناقشت بندوها مثلا بشكل علني في مجلس الشعب :( يمكن من مصلحتنا ماشي ليه لأ ؟
ما دام رئيس الدوله هيكون القائد الأعلي ليهم ويعرف ايه اللي بيحصل ولا هيكون طرطور ومش هيرفع عينه فيهم ؟

ما هو برده حته مدنيه دي راعباهم تقريبا إزاي أدي تعظيم سلام لشخص مدني ويبقي رئيسي ناهيني ونافخني تفتكروا الجيش بيأمن نفسه وعايز يعمل دوله داخل دوله ؟؟
 
طيب حته بيقولك سريه وهتتعرض في البند الأول في ميزانيه الدوله إزاي ؟؟؟ هيحطوا الخانه دي مكتوب عليها ايه في الموازنه مبلغ علي طول يعني ولا سريه ولا ايه بالظيط عايزين مثال علي ده ؟؟

ولو المجلس مثلا حب يشرع حاجه بخصوص القوات المسلحه من فساد او غيره لازم يوافق عليها هما الأول ؟؟ طب وده إسمه كلام يعني مبارك برده هنقوله علشان نشرع عليك حاجه لازم توافق

ده إستخفاف بعقول الشعب وتكبير للمشاكل وبيخلق دوله للجيش يسيطر عليها الجينرالات !!!!!!!!!!!1

وبكده الصراحه من الواضح فعلا نيتهم لتسيلم السلطه لمدني فعلا وتسلميها وخلاص ولكن لرئيس دوله هيكون طرطور في أيدهم هما مقاليد الأمور ومش كفايه إنه هيكون في قلبه الرعب بسبب الإطاحه بمن قبله ونهايته السجن والحبس وأي مظاهره تخرج هتلاقيه طالع يطل علينا ببيان  

في النهايه بوجهه رسالتي للسيد المشير طنطاوي ليه الخوف ده !!! ظنناك حامي للثوره فعلا وبعد كده قولت ما فيش أوامر جاتلنا بضرب الميادين والمتظاهرين أمال ليه حميته الثوره ومن مين بالظبط ؟

وكمان بتقولوا فيه وقيعه في الشعب وعايزين يدخلونا في صدام مع الجيش وكلنا قولناها للمره المليون زي ما نتم قولتوا مش هنفتح النار علي أبناءنا ولكن بتفتحوا إحيانا هنقولها لم نرضي أن ندخل في صراع مع قواتنا المسلحه لأنهم أهلنا وإخواتنا ولو ده حصل هيكون العاقبه وخيـــمه ولكن إسمحلي أقولك في النهايه أري غباء مبارك يتكرر في تقميع الشعب من محاكمات عسكريه للثوار وترك المفسدون في الأرض والبلطجيه .

ووضع رجال القوات المسلحه فوق القانون اللي كان واخده قبلها مبارك وهو دلوقتي في السجن !! 

ده حتي يا سياده المشير أجلتم تكريم المصابين وأهالي الشهداء إلي عيد ميلاد فخامتك نفس طريقه مبارك وفي الأخر سمتوه يوم من أجل مصر ولا جبتوا سيره المصابين ولا الشهداء هو ايه النظام مش معترفين بينا ولا ايه ؟؟



نتمني ألا يسوقكم غبائكم للضياع بالبلاد إلي أحداث لا يحمد عقباها .

وفي نهايه مقالي زي لمره اللي فاتت من السنه برده اللي فاتت أقول المره دي مش ربنا يستر عليه من مبارك وأعوانه ولكن من المحاكمه العسكريه ويقولك بيقول عبارات مناوؤه :))


التوعيــــــــــــــــــــــــــه هي الحـــــــــــــــل


محمود السيــــــــد