أقرأ وأفهم وصوت في الأخر زي ما أنت عايز في الترقيعات دي

رجعنا تاني للإنقسام وراحت روح الثوره وبدأ كل واحد في إتجاه معين علي حساب الشعب الغير مسيس
وبكل بساطه رجعت إنقسامات الإخوان ومواليتها للسلطه والنظام زي ما الكتاب بيقول والتاريخ بيقول بكده
مش وقته تصفيه حسابات ولا غيره ولا القضيه قضيه أخوان ولا وطني ولا غيره
ولكن القضيه قضيه بلد ومستقبل وطن زي ما قال د. إبراهيم درويش أستاذ القانون الدستوري

حابب أوضح للناس الأول إن اللي بيحصل ده والله ما دستور جديد أيوه يا عمنا مش دستور جديد دي شويه مواد كده
بيعدلوها واللي هما من الاخر كده عليهم لغط الفتره اللي فاتت واللي قامت علشانهم الثوره
من قضيه توريث جمي التركه قصدي السلطه
يعني يا عمنا اللي بيحصل ده بيفتح الباب أمام ترشيح أي شخص للرئاسه مستقل بدون قيود وكمان تحجيم فتره الرئاسه إلي 4 سنوات
وأيه كمان تعديل ماده مستفز وهو 75 بيقولك اللي متجوز أجنبيه مالوش حق الترشح وعارفين هي ليه أتعملت الإضافه دي ....

المهم دلوقتي اللي عايز أنبهه للجميع أن اللي بيحصل ده ترقيع للدستور وليس دستور جديد مكون من كام ماده دووول وبس وإلغاء باقي المواد لأ يا عمنا المووووووووووووووووووواد القديمه هترجع تشتغل بقه بسلاطتها ببابا غنوجها بصلاحيات الدكتاتور السابق مبارك.

طيب فوائد النعم للتعديلات الدستوريه :
--------------------------

• لمصلحه الجاهز بس وهما فلول الوطني اللي بيغيروا جلدهم دلوقتي في شكل تاني 
• الإخوان المسلمين لأنهم الأكثر تواجد علي الساحه دلوقتي نفسي أعرف بيجيبوا الفلوس دي كلها منين .

سلبيات النعم للتعديلات الدستوريه :
-------------------------

• سيتم إقصاء كل الأحزاب اللي يا معلم عملت الثوره اللي هما شباب الثوره دوول ده كلام برده يعني مش هياخدوا موافقه علي الإنشاء .
• هتخلق دكتاتور جديد أوسخ وأدل لأن صلاحياته زي ما هي في الرئيس يعز من يشاء ويزل من يشاء وساعتها كأنك يا أبو زيد ما غزيت .
• عدم وجود فتره كافيه للأحزاب الجديده في الإنتشار ودعم مشرحيها وبالتالي الكافه سترجح لصالح الإخوان والوطني .

وبالنسبه للي بيقول أن الصلاحيات هتروح بالنعم علشان المجلس التشريعيه هتيجي قبل الرئاسه ومنها الرئيس هيستمد شرعيته
هقوله ما بني علي باطل فهو باطل .
يعني أنت دلوقتي عايز تحظر الشباب والأحزاب الجديده ودول هما الشرعيه الحقيقه للرئيس القادم وده كان رد علي د.عصام عريان في أحدي أسباب موافقته علي التعديلات ولكل رأي يختلف ...

بالنسبه للي بيقول أن الرئيس القادم هيكون كويس وكمان هو واحد من أتنين د.برادعي أو عمرو موسي أو حتي المستشار البسطويسي
ودول ناس كويسين أيه المشكله أنهم يحكموا وهما في أيدهم السلطات دي
دول ناس عسل مش زي مبارك وهيبقوا معانه
أقوله راجع سياسات مبارك في أول حكمه من حكمه وقارن بينها وبين الجزء الأخير من حكمه...


أما لا للتعديلات الدستوريه :

فوائدها كالتالي :
--------------------

• إحنا بالثوره دي ما حدش ينكر أن النظام بالكامل سقط بما فيه التشريعي والتنفيذي والدستور كمان ليه ترقع ليه في دستور واقع
• عايزين دستور جديد ما يكنش فيه مبارك جديد وأنا ما أضمنش أخويه لو رئيس هيكون شكله أيه لو مسك وعاش في النغنغه دي و هيص لأ يا عمنا هينفخنا.....
• الحفاظ علي الثوره وشرعيتها والقضاء الكامل علي بقايا الفلول للنظام البائد.

 سلبيات لا للتعديلات الدستوريه :
-----------------------

• الإطاله في الحكم العسكري وما حدش عنده مشكله تجاه المجلس العسكري أو التشكيك في نزاهته .
• بطئ إنتقال السلطه وتسلميها للرئيس المدني وإحنا مش مستعجلين يا جددعان .
• أننا سنكون مع رئيس يدير البلاد دون مجالس تشريعية منتخبة لمدة عام تقريبا، إلا أن إعلانا دستوريا يضبط صلاحيات وسلطات الرئيس وينتصر للسلطة القضائية مع هيئة تأسيسية للدستور الجديد منتخبة انتخابا مباشرا من المواطنين وحياة سياسية حزبية تنشط لمدة عام قبل الانتخابات البرلمانية لهم معا أن يقللوا كثيرا من مخاطر سيناريو الرئيس المنفرد بالحكم دون مجالس تشريعية.
  
  والهدف من لا للتعديلات الدستوريه وليه أنا هقول لأ :

 هو تشجيع المجلس الأعلى للقوات المسلحة على تغيير الجدول الزمنى المقترح للانتخابات البرلمانية.


وبالنسبه للمدونه والكاتبه المحترمه نوراه نجم بتقول عايزين نخلص من الحكم العسكري ونوقف المحاكمات العسكريه ونستلم السلطه
بقولها أنا رأي نستلم الشغل نضيف انتي عارفه كويس جدا دلوقتي لو البرلمانيات بدأت الأول هيحصل أيــــــــــــه فيها
مجااااااااااااااااازر يا جدعان بجد


وفي النهايه لكل رأي يحترم ولكن أذكرك في النهايه اللي راح ضحيتها أكتر من 600 شهيد و 1500 مصاب وأكتر

أسباب قيام الثوره :
---------------------

1. إنتزاع السلطه من الدكتاتور مبارك وعدم الثوريث .
2. إنشاء دستور جديد للبلاد بدل اللي من 1971 ده وفيه قوانين من أيام الملك فاروق زي بتاع الطوارئ ده .
3. محاكمه الفاسدين والمتورطين في قضايا الفساد.
4. الثورة، قامت من أجل محو كل النظام السابق وآثاره.

ياريت تفكر وتحسبها صح قبل ما تختار نعم أو لأ

وفي النهايه أحب أسمع تليعقاتكم في الإستفتاء والنقاش حوله وياريت تدوس علي shaaaaaaaare
علشان الناس تفهم سلبيات والفوائد من الجانبين والحكم في النهايه ليها

-----------------